تقادت العطلة و حان وقت الجد و العمل نوستالجا 1996

تقادت العطلة و حان وقت الجد و العمل نوستالجا 1996

توحشت هاد الستونات ديال الدخول المدرسي و عاااك كانت الوليدة كتلبسني ديما قميجا فيها الكاروات أو سروال ديال الكاتيفة و سبرديلا ديال باطا كاع ديك التغوفيلا أو لوسخ اللي جمعتهوم في الصيف كيدزهوم ليا الحجام عندو مقص مصدي أو فديك الوقت ماكانتش المكينة كيشدك الحجام شي ساعتين أو كيرد ليك راسك بحال شي خروف فيه التونيا أو لي باط كينزل ليك عليهوم من حدا جدارت الودن بشي موس قديم فيه الكونصير أو كيديني لوليد لحمام كيكرفسني كيبقا يحوك ليا تكول كيقلب على شي سليب نسيتو تحت الوسخ, الموهيم هو النتيجة كتخرج زازلوكس, مللي كتم غادي لمدرسة كدير ليا لوليدة لفريقة حيت ديك الساع ماكانش جيل أو داك الشي ديال لاموض هيا كويبا, هيا هاديك كتخرج هاز مدكرة أو ستيلو بيك كتمشي المدرسة أونتا ماحاملش , كتجي موعليمة لقديمة كتكول لينا ديرو الصف أو كتمشي تجمع ليها مع راسها و حنا محنسرين لابسين مزيان زعما...شويا كيجو المعلمين ديال النيفو اللي غادي نقراو فيه عند الموعليمة أو كينيكوسييو معاها فينا .. هادا موجتهيد هادا كسول ... كيديرو داك لعجب بيناتهوم أو كيبداو اختارو فينا و كيكون شي موعليم شرير مكتحملش تجي عندو من عند الزهر هو اللي جافيك ولكن متخممش عندك بيستون لواليدة غادي تحولك عند صاحبتها و شكون جا عنداك فلفرونسي ؟
موهيم كيما درتي غادي جي فيك شي معليم ماشي جوسكا لابا

صافي سالا التنقيب على التلاميد كيصوكونا للقيسم أو كيبانو ليك اللي غادي قراو معاك و اللي جاو من الاقسام لاخرين او كتبدا دير علاقات أو أعداء أو التنافس كيبدا على شكون الزعيم ديال القيسم, المعلمة الجديدة كتجي كتكول لينا أش خاصنا نجيبو من الادوات و ما جاورهما من دفاتير و أغلفة ,كيعاني باك باش اكمل تغليف ديالهم و تقدر ترقعهم نتا 
مالين المكتبا كيسوخنو أو كيديرو احتكار ديال التلاوة أو لا ديال لكايي ديكزيرسيس بحال صحاب لخميرة فالتسعينات, و لكن هانيا كولشي داخل في أجواء الدخول المدرسي

ديك السيمانا اللولى ديال الدخول المدرسي ممقتاصراش غير على التلاميذ كولشي كيساهم فيها من قريب أو بعيد باك كايبقا تابعو لكريدي ديالها العام كامل , خوك لكبير كيبقا بلا كسوا, مول لحانوت ماكايخلصوهش بدعوى الدخول المدرسى أو عيد الأضحى , سوء التغدية لواليدا كتولي دايرا لونكيط على التلاوة أو كتولي قاهرانا غير بالأكلات السريعة من بيض و مطيشة أو ما شابه ... لموهيم كولشي خاصو اياخد حقو من الدخول المدرسي حتى هاداك اللي ماقاريش مكيسمحش فحقو كتنشط عندو البوطولا فالكوان ديال الدريبة

لموهيم من بعد هاديك السيمانا كتبدا لقرايا زعما و لكن فالكواليس ديال القيسم كينين شي ستونات كيعيشوها التلاميذ و اللي كيبقاو في اطار الحروب الأهلية أو الهدن السارية المفعول به تقديره الطاولة , غير هاديك الطاويلة كانت مسرح لحرب الزون أو ما يسمى بالحدود, مجتهد أولا كاسول خاصك تكون عسكري أو تحافظ على الطرف ديالك في الطاويلة اللي كانت كتقسم بالنص بــبيكار و اللي فات الكوود عندو الحدود ياويلي أش من أسلحة كانت كطيح فيه كولشي مسموح رشك فيه ستيلو أولا بيكار , أو في اطار حرب الحدود دائما كانت لمعليمة كتكول لينا جيبو قلع باش نغطيو بيه الحالة المزرية للطاولات التي ترتبت عن حروب الحدود القديمة , ولكن حنا كنجيبو غير نوص قلع كوللا واحد اغطي بلاصطو و السلام

ديك الأيام اللولى المعليم كيبغي فرض علينا شخصية باش ميطيحش في الوضعية القديمة ويبان درايف و حنا نزعمو عليه, كيورينا شي زرواطا و كيدير بيها التيست في حمَد أطول واحد فالقيسم واخا مسكين كان سليم و لكن أش داه اكون طويل؟
هاد العملية كتخليك تسمع تزنزين ديال الذبانة فالقيسم . أو الأستاد كيحس بالفحولة ديالو ساعا هوا غير حكار , مللي خرجنا حمد الطويل صدمنا بواحد السر كاليك ماتقساحس حيت داير شحمة الأرض؟ أوااه ... نهار التلات عندنا نوص نهار صافي غادي نمشو نقبو على هاد السبيد ديال شحمة الارض. بحال هاكدا بدا التعاروف مابين ولاد القيسم الجداد

...لا جيت نعاود ليكوم كولشي ماغاديش نسالي اوى اللي عندو مايزيد على هاد الشي افيدنا ويكتبو فالكومونتير