رمضان ديال الصغر في أيام الكوليج رمضان كان كايدوز

رمضان ديال الصغر

في أيام الكوليج رمضان كان كايدوز فشكال, كتفكر كنبقا غير نضحك الله يسمح لينا أو سافي, فايق مع الصباح أو هاز المحفضة او غادي ... فين المدرسة ؟ هاهاها واتا اش من مدرسة بحال لخوت كان عندي رمضان عطلة مفتوحة كندخول غير وقت ما كايقولها ليا راسي, كنت كانمشي لجردة قاعة الافراح أو كنلقى شعب ديال بنادم في عطلة, كنعصرو على بنات الفهرية, و كنبقاو لاعبين الرامي لا قرايا لا هوم يحزنون, كيكترو التفاتينات غير على الدريات و كاع بنادم كايتصاحب فداك رمضان, عالام, كترجع لدرب تال الربعة كدخل كتلقا الدار مخربقة بحال تقول نايدا فيها الحرب باش اوجدو لفطور, كاندير من ناقص كاع و كنهاز كاروستي و نمشو لعكبة ديال الجامع كنبقاو نتزلقو تما تا كيتكا علينا واحد خاينا ديما حاكر علينا كايدي لينا لكرارس, اللي هرب هرب و لي حصل مشاو ليه لورمات, الموهيم من بعد كنمشو نتفرجو في التورنوا ديال تيران السبيطار تال 5 و نص كتنوض شي تفاتينا أو مكيكملش الماتش شويا كتولي الحرب بين الجمهور, كنعلق من لولين هربان و كنضحك, كنرجع لدرب كانبقاو مجمعين على داك الشي اللي وقع تا كتزوك الزواكة .كنمشو الجامع كنصليو أو ملي كنخورجو كايفرقو علينا التمر غاديين او كنقسيو غير كندخل لدار كتسد ليا الشهية و فطور فيه غدا ديال شهر لحريرة غير كاتشيط و الحلوة و سليلو تا واحد ما بغاهوم, و العسل و الزبدة و داك الشي مزيت و عااااااك قاليك علاش كايجيك النعاس من ورا لفطور و علاش كايبقا تابعاك لكريدي ديال رمضان العام كامل .
هي هديك غير كايتهز لفطور كايتحط لعشا تاهو غير كايتلاح شي طاجين ديال لحون منصوب كتبغيه للدوا فيام القس و الله ماتلقاه من ورا صلاة العشاء كنضربو شي ركعات في التراويح و كندردكو لمدينة نضربو دوايرا بيما عمر السيرك, كانمشو تال باب الشعبة و رجعو كانلقاو السرك عمار ... وااااااو على دوك ليام كنت كنمشي نتفرج فالطونوبيلات و كانبقا نتصنت لدوك الدياسك ديال الراي اللي كانو كايطلقو شي ديسك ديال الشاب حسني ولا عمرو كيسرح بيك فشي دريا تما حتى كايوقفو عليك الدراري .. و فين اصحبي و زيد زيد نقمرو.
كنمشو عند مول (كبيرة صغير و السبعة مدوبلا) كانربحو و كنخسرو لموهيم هو عملرك تلاع رابح ديما كايطب لينا رزقتا كيبقا لينا غير باش نشدو كاسكروت ديال السوسيس ديال السرديل او الشحمة و مع داك الجوع كيجيك بحال لعسل.
من بعد كانهودو لمدينة كاتكون مبلوكيا كندربو حتى كانوليو كاو و كنطلعو لدرب نجمعو شويا أولا نبرمجو شي ماتش في حالة لا مكنا داخلين لتا تورنوا, ابري كندخول نتفرج فشي فيلم بحال داك السبيد ديال الكواسر او كنعس تال السحور كتعيا لوليدة تفيقني مرة نفيق مرة لا .