الحياة , لفلوس, الشخصية… كلها وكي جاتو و كاين

الحياة , لفلوس, الشخصية… كلها وكي جاتو و كاين اللي جابها لراسو

المسيرة ديال بنادم في الحياة كتبدا من الصغر يعني إلى حددتي الهدف غادي تحدى كولشي باش توصل ليه قد ما طوالت الايام, و لكن بعد المرات كاين اللي ماكيوصلش و اللي كان باغي وصل بالزربة و نسا لبنوّا سوكور, و الحياة هيا هادي مرة طايحة مرة نوضا غير هو بنادم خصو مايأسش , و الصراحة أنا كتعجبني حياة النيبالا يعني تعيش حياتك كيف بغيتي و مكتهمكش حياة لاخور, ملي كنقول هكدا ممندويش على القس و الخدمة (حقاش هادو غير وسيلة من بزافة الوسائل للعيش و اللي متعارف عليهم هدا مايمنعش أن هناك وسائل اخرى ) أنا كندوي على دير لي قال ليك راسك فوت غير الدين و الوالدين و تمشي فيما بغيتي واخا تكون بوحدك و على رجليك, هادي هيا الحياة, و كاين لي حياتو غير تدمر ديما كاعي, ملي كتسولو كايجابك … تالع ليا الدم معرفتش مالني… لولون …كيكون متأثر بالجورنانات و داك الشي ديال الفلسفة و اللاماهية, مني توقف حداه و هو يدوي ليك على الأحزاب و السياية و الاخبار, أخويا أنا مكنفهمش فهاد الشي سمح ليا أنا غير حمق فالعالم ديالك أولا امي سميها كيف بغيتي, عاجبني راسي كوم سا و كول راس عند مولاه بوكوس.الصراحة كايبقاو فيا دوك الناس اللي ماعارف حتى مالو كاعي و باغي يعرف أشنو خاص ايدار واشنو ليماخاصوش ادار… كاين اللي كايكمي و كاعما عارف علاش ,كايقول ليك بلاوني و كاين اللي هو فحد داتو عالام ممفهومش و باغي فهم العالام,
على ما استنتجت بحال لخوت أن الشخصية ديال بنادم وليدة للمحيط اللي تربى فيه و لكن كتوصل واحد المرحلة بنادم خصو يدير بريك و مايشوفش وراه و ينسى علم الكراسة و علم الزنقة و يبدى حياة جديدة فيها إيمان بأن الوقت تبدلات أو مازال كتبدل دقة دقة و داك الشي اللي ورتناه من الماضي غادي و كايتلاشى مع الوقت و يتفادى بنادم يكون سلاح واحد أخر كيستغل السداجة دبالو أو الاحتياج أو الحالة النفسية, الله ينعل بو الضعف و الله ينعل اللي كيستغلو الأبرياء في تحقيق أهدافهم . عيش حياتك كيف ما بغيتي و تمتع بيها راه الفلوس وسيلة فقط و ليست غاية.
اللي معندو فلوس كلامو مسوس و لكن يقدر املحو.
و اللي عندو لفلوس كلامو مغشوش و من غشنا فليس منا.