لباس لحنش مابقا يواتينا ولاد الدرب هضرتهم ديما

لباس لحنش مابقا يواتينا

ولاد الدرب هضرتهم ديما على الكاورية و لهيه, لي دويتي معاه كاعي كايقول ليك هادوك الناس الله يعمرها دار و المغاربة خايبين بحالا هو من المريخ و دوك الناس مسكيين من مغرفة وحدة, السلامة كاملين قاريين في نفس الكراسة, و لي تسمعو من هادا تسمعو من لاخر, كاين لي عايش بيخير وباغي يمشي بأي طريقة ... الطريف في الأمر أن الأكثرية باغي مشي على حساب أسطورة القوة الجنسية للمغاربة أو مايهامش الكاورية كيدايرا أو شحال عندها من عام... غير الكاوريات باقي ماعاقوش ما كون دارو شي جمعية ديال الشارفات لي كايتبناو الشباب بغيت نقول يتزوجوهوم... و لكن الستون لواعر هو ملي كيجو شي مجموعة ديال السياح و كايكون شي واحد هو أو مرتو مع هوما مفاهمين كيخرجو مع بعضياتهم ماشي بحالنا غير كايتزوجها كايحكم عليها بالمؤبد و الأعمال الشاقة و مايرداش اخرج مع مرتو حيت باقي فيه لفيس ديال لعيالات (هادا موضوع أخر)... الموهيم الراجل أو مارتو كايوقفو اشوفو التراث ديالنا كايخرجو مالين لحوانت و كايتقابلو مع المرا علا و عسا تشوف فشي واحد و تخلي راجلها باش دير معاه علاقة , و لي دايز كايهز فيها عويناتو باش اطيحها راه بنادم لي طايح على راسو.بالنسبة للرجال ماعندهوم زهر, لا كانا حنا كنغربو الساطات عندتا كايشرقو كايديرو التنقيب على البترول, و دوك صحاب لكولف عايقين بالستون, أنا بعدا كاتخلاعني شي وحدا كدوي فالتيلفون تقول غير كويتية, ويلا كنا حنا لابسين السينيي و الماركات هوما لابسين العبايات و دايرين داك لعكر لحمر ولكحل, كلها و حر في ستيل ديالو. و الله يهدي ما خلق. و الله يهدينا على سباغتنا, ألمكسي بحوايج الناس راك عريان.