كلام لعيالات حميد بولحنوك ناشط ليوم, شراو خروف من

كلام لعيالات

حميد بولحنوك ناشط ليوم, شراو خروف من الرحبة و جايبينو في كروسة, الصراحة ماعجبنيش ماسمينش ماعندو كرون ولكن مع باه موعليم كايضرب على المستقبل... بنادم هو لي تقدا الضحية دابا ماحدها رخيصة, منها اقتصاد و منها يموسقو بيه الجيران, ملي كان جاي تلاقاو ليه بالزغاريت و الجوقة أنا في الأول سحاب ليا غير الشايطة خوت بولحنوك جا يدوي فيها دريس النجار, كيشتي شحال و هي معاه, الليستر ماعرط أش عجبو فيها... مادوينا فيها, شوفو شوفو بوها سالم باغي طلع لخروف مع الدروج و هو ماعندو صحة, مسكين لمرا واكلاه أو مسكللاه و الزغبي داير كي الضبع, تصيبها هي مولات هاد الفكرة, ساولوني أنا على الطاهرة مراة سالم ماتخلي شوافات ماتخلي طلبة, بقات عليه مسكين تا طايحت ليه الروايض... كيعاودو عليه كان واعر.
الحاصول الليجيب ليا شي واحد بحالو, ولايني أنا مبغيتش نتزوج, جا بغاني المعطي مول لفاخر على مراتو لي ماتولدش عاكرة الليستر شكيكو, و العوني مول الكاسكروطات ساعة بويا كان مسافر, ايوا معندي زهر و خلاص, زعما أنا داخلا سوق راسي و كاع ولاد الدريبة كايشوكروني كايعيطوا عليا في الدرب غير السعدية لاراف.