لي معبد سيدو عبد لالاه التغوفيل هي الهواية

لي معبد سيدو عبد لالاه

التغوفيل هي الهواية المفضلة عند بعض المغاربة أثناء قضاء الحاجة, مثلا كتمشي تخلص الضو أولا الما و جيتي مع الجوج كايجي شي واحد من وراك أو كيخلص قبل منك, كيفرنس زعما شمتك, و كل واحد و الأسلوب ديالو باش اقضي حاجتو كاين لي كايستخدم العنف و كيغمق على لوراق لي قدامو و كيدير بحالا كيرتبهم و كايسبق ورقتو و كاين لي كايمشي عند المسؤول و كايقول قاليك الحاج سبقني, حتى في بعض الادارات مازال ديك القضية ديال صايفطني عندكم فلان باش تختصر الوقت أو باش اسبقوك, كيعجبني فيهم غير شي واحد معقول كيقول ليه : تا سير شد السربيس أش من حاج ولا عامر, و لكن كثيرا ما كتصدق هاد اللعبة, واحد النهار مشيت عند مول النعناع و قلت ليه قال ليك الواليد أحمد لي خادام في الطوبيس عطيه شي ربطة مزيانة, ضحك و جبد ليا وحدة من لوسط و زاد عليا 4 ريال, هاد لمعرفة ماكتنفاعش مع لبياع و شراي, فيها لانتريس.أشناهي الفائدة من هاداك الجسر ديال المعرفة مادام في الأخر غادي تقضي داك الشي لي بغيتي؟ و علاش ولد فلان كيخدمو معاه الماط ؟ ماعمر القيمة ديال الانسان كانت بالنسب و داك الوقت ديال الأسياد مشا معا ماليه و اللي عندو سيدو ولا عندو حتى لالاه راه غير مذلول. و هل يتباها القن بكونه عبدا ؟ الله يستر