الشنعة حسن من ركوب الخيل انقرض الفيسيدورات من

الشنعة حسن من ركوب الخيل

انقرض الفيسيدورات من المدينة القديمة, و حقيقة دوزوها و دازت و دوزوها علينا, دارو لباس, و لكن عايقو مع كثرة المنافسة ولاو كايتاجرو في كولشي حتى من لعراسات و الافراح , لي عندها شي مهارة تزاير شوية قبل ماتلقى بنادم كايتفرج فيها في المدينة, و لي كايتكيف أو كاينشط في الخفاء رد البال الكاميرات في كل مكان و الفيسيدورات في كل مكان, قاليك شي وحدين حكا و الواد كايديرو لبيراطاج, و زعما داك الشي بالعلالي تقدر تكون دايز و تلقى شي حانوت داير فلاش النيميريك و كنال بليس, كادخول تبغي تعاون معاه على الزمان كايقول ليك 50 درهم, أواه نتا غير شافرها و داير ليها 50 درهم واحد النهار براهيم شاري بورطابل أو فرحان باغي ديكوديه ميديتيل, مشينا عند واحد خاينا قال لينا 40 درهم, ايوا قلنا نهودو للسوق عند واحد خاينا معرفة عندو معا الديكوداج, وقفنا عليه قالينا 60 درهم, براهيم قال ليه راه واحد خاينا حسب لينا غير 40 درهم, و هو يقول لينا هاداك عندو أورديناطور؟ قلنا ليه oui قال لينا أنا عندي PC .بحال هاد الطرائف كاينين بزاف شي وحدين واخدين غير الشنعة و كاين لي تقافتو على قد الحال و بان ليه الصرف في السيديات, مؤخرا واحد الديفيدور جات عندو واحد الساطا.
- عاندك الفيلم لاخر ديال طومي كلاوز.
* أه كاين المهمة المستحيلة.
- ايوا عطيني شي واحد vrai راه هاداك لي عطيطيني ديك النهار مصور غير من السينما كنت كانتفرج أو بنادم كايبان ليا كايوقف.
* هادا مزيان يالله جا من لميريكان.
- شوف راه لا كان عيان غادي نرجعو ليك و عطيني ألف فرانك ديالي.
* سافي غير ديه على حسابي.

يا سبحان الله فيلم مقيوم بغسيل لفندق غادي بيعو ليها ب 10 دراهم ما هي تا قيمة خلاص داك خاينا لي كاتفلت لقرطاسة لبطال و كاتجي فيه و خايتي كاتشرط.
طوم كروز وقيلا عمرو ما تعامل ب 1$, نهار اجي عندي نهودو لمدينة نقول ليه راك عزيز على بنادم اودي أطوم كولشي أفلامك تفرجنا فيهم و كرافيتهم لصحابي تاهوما و صحابي كرافاوهم لصحابهم , أو أجي تشوف الناس كايتخاطفوا على الفيلم ديالك لاخر من عند الفيسيدورات.

و لكن لواعرة هيا نهار مشيت نسول على بلاي ستاسيون دخلت أنا و دريس عند هاداك خاينا جبدها لينا نتيستوها شويا لقينها كاتبلوكا, صديقونا تزاير و هو يجمعها في كارطونا او قال لينا هادي را خدامة خاص غير ايجي الدري لي عندو الإميل ديالها.